काठमाडौँ /३ जेठ – शिक्षा तथा मानव स्रोत विकास केन्द्रले राजनीतिक दलको कार्यकारिणी समितिको सदस्य रहेको शिक्षक/कर्मचारीलाई कारवाहीको सवालमा विवरण उपलब्ध गराउन निर्देशन दिएको छ । सबै शिक्षा विकास तथा समन्वय इकाइलाई १५ दिनभित्र विवरण उपलब्ध गराउन निर्देशन दिएको हो ।
राजनीतिक दलको सदस्यता लिएका, राजनीतिक दलको कार्यकारिणी समितिमा रहेका तथा महाधिवेशन प्रतिनिधि भएका शिक्षक कर्मचारीहरुलाई प्रचलित कानुन बमोजिम कारवाही प्रक्रिया बारे विवरण पठाउन भनिएको छ ।
साथै विद्यालय व्यवस्थापन समिति र शिक्षा विकास तथा समन्वय इकाइको स्वीकृति नलिई आफू बहाल रहेको विद्यालय बाहिर काम गर्ने तथा काजमा बस्ने के कति शिक्षकहरु छन् र ती मध्ये कति शिक्षकहरुलाई पदाधिकार रहेको विद्यालयमा फिर्ता गर्ने व्यवस्था गरियो भन्ने बारे जानकारी पठाउन केन्द्रले परिपत्र जारी गरेको छ ।
इकाइहरुलाई १५ (पन्ध्र) दिनभित्र सम्पुर्ण विवरण केन्द्रमा उपलब्ध गराउनुपर्ने पत्रमा उल्लेख छ ।
