काठमाडौं/१२ साउन- पाेखरा विश्वविद्यालयले लकडाउनका कारण स्थगित गरेकाे परीक्षा भदाै अन्तिम सातादेखि लिने भएकाे छ ।
विश्वविद्यालयले सूचना जारी गर्दै भदौ अन्तिममा सुरु गरेर दशैं अगाडि नै परीक्षा सम्पन्न गरिसक्ने जनाएकाे छ । लामो दुरीका गाडीहरू भदौबाट मात्रै खुल्ने र विद्यार्थीहरू देशका विभिन्न भागमा छरिएर रहेकाले भदौ सुरुमा परीक्षा सञ्चालन गर्न नसकिने सूचनामा उल्लेख गरिएकाे छ ।
विश्वविद्यालयले परीक्षा सञ्चालन गर्दा सरकारले जारी गरेको स्वास्थ्य सुरक्षा मापदण्ड अपनाईने जनाएको छ । सरकारले भदौ देखि विद्यार्थी भर्ना र परीक्षा सञ्चालन गर्ने निर्णय गरेसँगै विश्वविद्यालयहरुले परीक्षा सञ्चालनको तयारी गरिरहेका छन् ।
